( آهـ ماارق الرياض تالي الليل ) .. معليش يا بدر عبدالمحسن بس هالكلام أول .. أما الحين آهـ ياشين زحمة الرياض بالنهار والليل .. المدينة الصغيرة اللي توسعت وكل يوم تزيد اتساع .. ما عاد تحتمل المزيد من السكان ولا المزيد من الاختناق السكاني والمروري .. بوجود 5 ملايين نسمة على الأقل.

في الرياض فقط ،، من الطبيعي أن تجد أن أي عامل هندي قد يملك سيارة .. وأي عائلة مكونة من 4 أفراد تملك ما لايقل عن 5 سيارات .. وأي شخص يتخرج من المتوسطة قد يكافأ بسيارة ..! وبالتالي من الطبيعي أن تكون قضية الرأي العام هي (قيادة المرأة) .. لدينا أزمة فكرية اسمها السيارة .. وكأن الله لم يخلق من وسائل التنقل سوى هذه الآلة الخرقاء التي تملأ الأفق دخاناً وضجيجاً.

الاختناقات المرورية بالرياض أصبحت لا تطاق ،، وصار الواحد يفكر بالزحمة قبل ما يفكر بالمشوار نفسه .. شوارعنا ما فيها أي نوع من الجذب والمتعة كلها تجيب الهم والغلقة .. يعني ما يمديك تنسجم مع أغنية في الإف إم إلا وصوت واحد معلق بوري السيارة وراك لأنك تأخرت 3 ثواني مامشيت يوم فتحت الإشارة ..!

دائماً أتساءل ما الذي يمنع من إنشاء مترو لمدينة الرياض؟ أول ميزة للمترو إنك راح تتخلص من سيارات الأجانب اللي يمثلون تقريباً ثلث سكان الرياض .. العامل أو الأجنبي لما يحصل مترو سريع ورخيص ليه راح يضطر يشتري سيارة؟ وفي نفس الوقت راح تقل سيارات الليموزين اللي ملت الديرة بشكل غير طبيعي ، يعني المترو راح يخلصنا من نصف سيارات الرياض مع أول يوم من تدشينه.

ولا ننسى الفوائد الاجتماعية والبيئية والسياحية اللي راح نحصلها ،، الحوادث راح تقل ،، وحتى النفسية راح تكون مرتاحة بدل النرفزة والعصبية اللي نشوفها بالشوارع وعند الإشارات ، صدقوني كل شي راح يصير أجمل .. والرياض راح تكون أحلى بكثير .. بس متى ..؟

اذكر الصيف الماضي بباريس سألت شخص فرنسي عن سبب جمال شوارعهم ، ابتسم ثم قال لي جواب غريب: (ارتفاع أسعار النفط !!) بالرغم من انه جوابه ماله علاقة بالسؤال .. لكنه كان له مغزى وهو ان الفرنسيين والأوروبيين قليل استخدامهم للسيارات -مقارنة فينا حنا- بسبب ارتفاع البنزين، واذا شروا، شروا سيارات بالديزل، وطبعاً هالشي بسبب وجود بدائل كثيرة (الأندرجراوند – الباص – القطار – الشاتل – الدبابات) ، بالتالي صار الشخص يستمتع بجمال الشوارع الفعلي بدون سيارات، رؤية المشاة والناس، والمناظر الطبيعية، المشي بلحاله متعة في باريس، أما هنا، ارفع حجر تجد سيارة :)

Popularity: 22% [?]